Павлодар облысының сыбайлас жемқорлыққа қарсы қызметі Павлодар облыстық полиция департаментінің бұрынғы бастығы, полиция генерал-майоры Нұрлан Мәсімовке қатысты сотқа дейінгі тергеу амалдары басталғанын мәлімдеді.
Ол (Қылмыстық кодекстің 366-бабы, 4-бөлігі бойынша) аса ірі көлемде пара алды деген күдікке ілінді, деп хабарлайды Сыбайлас жемқорлыққа қарсы қызмет.
«Осы факті бойынша оның іс-әрекеті сырттай сараланды. Тергеу соты оған қатысты күзетпен ұстау түріндегі бұлтартпау шарасына санкциялады. Мәсімовке іздеу жарияланды. Қазіргі уақытта оның орналасқан жері анықталуда», — делінген хабарламада.
Тергеу нәтижелері бойынша тиісті процессуалдық шешім қабылданады, деп қорытындылады Сыбайлас жемқорлыққа қарсы қызмет.
Нұрлан Мәсімов 2019 жылы қараша айында Павлодар облысының ПД бастығы лауазымына тағайындалып, 2022 жылы қаңтар айында қызметінен босатылды.
БАҚ-тың хабарлауынша, Нұрлан Мәсімов ҰҚК-нің бұрынғы басшысы Кәрім Мәсімовтің немере інісі, ол мемлекетке опасыздық жасады және билікті күштеп басып алуға немесе Қазақстанның конституциялық құрылысын өзгертуге бағытталған әрекеттер жасады деп айыпталды.
