Павлодар облысының тұрғыны бөтен жерден шөп шабып, оны миллион теңге түсіммен сатқан. Жәбірленушінің арызы бойынша қылмыстық іс қозғалды.
“Полиция бөліміне Ертіс ауданы Ұзынсу ауылының тұрғыны өзінің ауылдасы өзіне тиесілі жер телімінде өз бетінше шөп шабып, шөптің бір бөлігін жақын маңдағы ауылдардың тұрғындарына сатып үлгергенін мәлімдеді”, – деп хабарлады Павлодар облысы полиция департаментінің баспасөз қызметі. Оған ауыл тұрғыны келтірген алдын ала шығын бір миллион теңгеден асты. Павлодар облысы Ертіс аудандық полиция бөлімінде ұрлық фактісі бойынша Қазақстан Республикасы ҚК екінші бөлігінің 188 “Ұрлық” бабы бойынша сотқа дейінгі тергеу басталғанын хабарлады. “Егер шөп шауып алған ауыл адамының кінәсі дәлелденсе, жаза ірі айыппұлдан үш жылға дейінгі мерзімге қамауға дейін болады”, – деп толықтырды құқық қорғау органдары.
