Армения Премьер-Министрі Никол Пашинян Ресей Президентімен келіссөздер барысында республика мен Таулы Қарабақ арасындағы үздіксіз байланысты қамтамасыз етудің маңыздылығын атап өтті.
2022 жылы 12 желтоқсан, дүйсенбі күні Пашинян мен Путин телефон арқылы сөйлесті. Бұл туралы Армения министрлер кабинетінің баспасөз қызметі хабарлады.
«Тараптар Лачин дәлізіндегі жағдайды реттеуге қатысты мәселелерді талқылады. Премьер-Министр Пашинян Армения мен Таулы Қарабақ арасындағы үздіксіз байланысты қамтамасыз етудің және осы бағыттағы Ресейдің бітімгерлік миссиясының дәйекті қадамдарын жүзеге асырудың маңыздылығын атап өтті», — делінген хабарламада.
Дүйсенбі күні таңертең өзін экологтармыз деген бір топ әзербайжандықтар Армения мен Таулы Қарабақты байланыстыратын жалғыз жол Лачин дәлізін жауып тастады. Ереван бұл қадамды танылмаған республикада гуманитарлық апат тудыруға бағытталған ресми Бакудің арандатушы әрекеті деп бағалады.