Қостанайда өрт кезінде 11 үй және 4 көлік жанып кетті.
Бес адам емдеу-сауықтыру орнына орналастырылды.
Өрттің шығуына Тобыл өзенінің жағалауындағы қамыстың өртенуі себеп болған.
Бұл туралы қала әкімі Марат Жүндібаев айтты.
«Алдын ала болжам бойынша 11 тұрғын үй, шаруашылық құрылыстары (саны нақтылануда) 3 бірлік жеңіл автокөлік және 1 бірлік жүк автокөлігі өртенді», — деп жазды Марат Жүндібаев әлеуметтік желідегі парақшасында.
ТЖД хабарлағандай, тағы екі тұрғын үй өрттен жартылай зақымданды.
Қызыл жалын сағат 21:24-те ауыздықталды. Құрбан болғандар мен зардап шеккендер жоқ.
Әкімнің мәліметінше, «Достық» профилакторийінде уақытша орналастыру үшін қазіргі уақытта тамақтандыруды ұйымдастырумен 5 адам жүгінді.
«Өрт кезінде зардап шеккендер қажетті көмек көрсету (уақытша орналастыру, тамақтандыру, психологиялық көмек) мәселелері бойынша iKomek Ахуалдық орталығына 109 нөмірі бойынша хабарласа алады», — деп хабарлады Марат Жүндібаев.
10 мамырда ол өрттен зардап шеккен тұрғындармен кездесу өткізеді.
9 мамыр күні кешке Қостанайда Тобыл өзенінің жағалауында қамыс өртеніп, қатты желдің салдарынан от жеке үйлерге шарпыды.
