Құрама Штаттардың Біріккен Ұлттар Ұйымы жанындағы бұрынғы тұрақты өкілі Никки Хейли Пентагон басшысы Ллойд Остиннің ауруханаға жатқызылуына байланысты президент Джо Байденді отставкаға кетуді талап етті. Алдағы президенттік сайлауда Республикалық партиядан кандидат Хейли мұндай жағдай Вашингтон әкімшілігінің жұмысына сұрақтар туғызатынын атап өтті.
«Менің ойымша, Остин емес, Байден кетуі керек. Мұндай жағдайға қалай тап болғанымызды түсіне алмай отырмын. Қазір Еуропамен арада жанжал шығып, Таяу Шығыста жағдай шиеленісті, Солтүстік Корея зымырандарды сынақтан өткізуде, бұл АҚШ-қа қауіп төндіруде», — деп мәлімдеді ол Айовадағы сайлаушылармен өткен кездесуде, деп хабарлайды Fox News телеарнасы.
Хейлидің пікірінше, орын алған оқиға Байденнің қорғаныс министрімен тұрақты байланыста емес екенін көрсетеді. Ол АҚШ-тың жаулары Остиннің денсаулық жағдайы туралы білгенін, ал президент хабардар болмағанын атап өтті. «Сайлауға дейін Байденнің кесірінен тағы не орын алуы мүмкін деп алаңдаулымын. Ол бізге қауіп төндіріп отыр», — деп қосты Хейли.
Бұған дейін Ұлттық қауіпсіздік кеңесіндегі стратегиялық коммуникациялар жөніндегі үйлестіруші Джон Кирби мәлімдегендей, Байден Остинді қызметінен босатпайтынын, бірақ Вашингтон оның ауруханаға жатқызылғаны туралы уақтылы хабарланбағанына байланысты тексеру жүргізетінін айтқан болатын. Ақ үйдің баспасөз хатшысы Карин Жан-Пьер президенттің 70 жасар Остинге толық сенім артатынын атап өтті.
Бұған дейін АҚШ Конгресінің мүшелері Остиннің ауруханаға жатқызылуы туралы ақпараттың кеш хабарлануына байланысты түсініктеме беруді талап еткен еді. Politico газетінің хабарлауынша, Қорғаныс министрлігі 1 қаңтарда медициналық процедурадан кейін ауруы асқынуына байланысты ауруханаға жатқызылған министрдің орналасқан жері туралы ақпаратты Ақ үйден үш күн бойы жасырған еді.