Нигерия Орталық Банкі екі жылдан астам уақыт бойы күшінде болған криптовалюта саудасына қойылған тыйымды алып тастау туралы шешім қабылдады. 2021 жылғы ақпанда қаржылай тәуекелдер мен лаңкестікті қаржыландыруға байланысты енгізілген тыйым алынып тасталды.
Reuters агенттігінің ақпаратына сәйкес, Нигерияның Бағалы қағаздар және биржалар жөніндегі комиссиясы 2022 жылғы мамырда цифрлық активтерге қатысты ережелерді жариялады, бұл елдің криптоактивтерге толық тыйым салу мен оларды реттелмейтін пайдалану арасындағы теңгерімді табуға тырысатынын көрсетеді.
22 желтоқсанда Нигерияның Орталық банкі виртуалды активтер қызметтерін жеткізушілерді (VASP) реттеу қажет екенін атап өтті. Жаңа ұсынымдар банктер мен қаржы мекемелеріне шот ашу және криптоактивтермен операциялармен айналысатын фирмалар үшін арнайы қызметтерді ұсыну туралы нұсқаулықтар береді.
Криптовалюталық бизнеске қатысу үшін виртуалды активтер қызметтерін жеткізушілер Нигерияның Бағалы қағаздар және биржалар жөніндегі комиссиясынан лицензия алуы тиіс. Алайда банктерге әлі күнге дейін криптовалюталармен сауда жасауға, сақтауға немесе транзакция жүргізуге тыйым салынады, деп атап өтті Нигерия Орталық банкі.