2021 жылғы 30 маусымда Кремльде Нұрсұлтан Назарбаев пен Владимир Путин кездесті.
Бұл туралы Елбасының баспасөз хатшысы хабарлады.
«Кремльде Нұрсұлтан Назарбаев пен Владимир Путиннің кездесуі өтіп жатыр», — деді Айдос Үкібай.
Бұған дейін айтылғандай, Қазақстан мен Ресей арасындағы стратегиялық серіктестік пен одақтастық қарым-қатынастарын одан әрі дамыту, еуразиялық кеңістіктегі интеграциялық процестерді ілгерілету мәселелері, сондай-ақ халықаралық өзекті тақырыптар талқыланды.
«Біздің байланысымыздың тарихы, яғни Қазақстан мен Ресей арасындағы қарым-қатынас – тұрақты әрі мемлекетаралық қатынастың үлгісі болып саналады. Мен бұдан былай да осы бағытты ұстана беремін», — деді Нұрсұлтан Назарбаев.
ҚР Тұңғыш Президенті Ресей Президентіне пандемия кезінде Қазақстанға көрсетіп жатқан қолдауы үшін ризашылығын білдіріп, Қарағанды фармацевтикалық зауытында ресейлік вакцина шығару аясындағы тиімді әріптестіктің жайына тоқталды.
Владимир Путин коронавирус пандемиясының теріс әсеріне қарамастан екіжақты байланыс оң қарқын алып отырғанын атап өтті.
«Сіздің арқаңызда Ресей мен Қазақстан арасындағы қарым-қатынастың даму қарқыны болашаққа сеніммен қарауымызға мүмкіндік береді. Пандемия салдарынан тауар айналымы 4 немесе 5 пайыз төмендегеніне қарамастан, биылғы жылдың алғашқы жартысында 20 пайызға жуық өсім байқалып отыр. Бұл өзге бағыттар бойынша да біздің қарым-қатынасымыз өте жақсы дамитынын көрсетеді», — деді Владимир Путин.