Соңғы үш айда Нұр-Сұлтан экономикасына 154 млрд теңге түсті.
Президент Қасым-Жомарт Тоқаев елорда әкімі Алтай Көлгіновтің 2022 жылдың бірінші тоқсанның қорытындысы бойынша Нұр-Сұлтанның әлеуметтік-экономикалық және инфрақұрылымдық дамуы жөнінде есебін тыңдады, деп хабарлайды Ақорданың баспасөз қызметі.
Елорда әкімдігі Президенттің тапсырмасы бойынша әлеуметтік нысандар салу, тұрғын үйлер алабын дамыту, шағын және орта бизнесті қолдау, құрылысы ұзаққа созылған нысандардың жұмысын аяқтау, жекеменшік сектордан инвестиция тарту жөнінде жүйелі жұмыстар жүргізіп жатыр. Атап айтқанда, биылғы үш ай ішінде 600 мың шаршы метрден астам тұрғын үй пайдалануға берілген. Қала экономикасына 154 миллиард теңгеден астам қаржы тартылған. Жекеменшік сектордан инвестиция тарту көлемі былтырғы жылдың осы кезеңімен салыстырғанда 4,3 пайызға өскен. 2021 жылы 1,2 триллион теңгеден астам қаржы тартылған.
Президент қала жұртшылығының пікірін ескере отырып, елорданы жоспарлы түрде одан әрі дамыту және абаттандыру жұмыстарын жалғастыруды тапсырды.