Қазақстанда машина жасаушылар форумы онлайн форматта ашылды. Іс-шарада ҚР Президенті Қасым-Жомарт Тоқаев сөз сөйледі.
«Құрметті форумға қатысушылар, сіздерді Қазақстанның машина жасаушыларының сегізінші форумының ашылуымен құттықтаймын!
Форум мемлекет пен бизнестің жүйелі диалогы, отандық машина жасау саласын дамытудың өзекті мәселелерін шешу үшін жетекші алаңға айналды.
Биыл іс-шаралардың көпшілігі онлайн режимде өтеді. Осы форум мен оның аясында ашылған машина жасау және металл өңдеу жөніндегі бірінші халықаралық онлайн-көрме де ерекшелік емес.
Пандемиямен байланысты күрделі экономикалық кезеңге қарамастан, отандық машина жасау өсімнің жақсы қарқынын көрсетуде — ағымдағы жылы 14 пайызға өсті. Бұл көрсеткіш бойынша сала еліміздің барлық өңдеуші секторы бойынша жетекші орынға шықты.
Жолдауымда мен әртараптандырылған және технологиялық жағынан дамыған экономика құру, өңдеу өнеркәсібі өндірісінің көлемін 1,5 есеге ұлғайту жөнінде міндеттер қойдым. Бұл үшін мемлекет отандық өндірушілерді қолдау тетіктерін жетілдіреді, «Өнеркәсіптік саясат туралы» заң қабылданады.
Қазіргі заманда Қазақстанның машина жасау саласы өзінің қарқынды дамуын жалғастыратынына сенімдімін. Саланың өндірісті кеңейту және экспортты ұлғайту үшін айтарлықтай әлеуеті бар.
Баршаңызға жемісті жұмыс пен алға қойған мақсаттарға жетуде табыс тілеймін! — делінген құттықтау хатында.
