Моңғолияның СІМ басшысы Нямцэрэнгийн Энхтайван Ресейге сапармен барып, халықты коронавирустық инфекцияға қарсы вакцина ойлап табуымен құттықтады.
«Мен [Ресейді] моңғол халқының атынан әлемдегі алғашқы COVID-19 вирусына қарсы вакцина жасай алған РФ үкіметінің, дәрігерлер мен ғалымдардың күш-жігері үшін құттықтағым келді», — деді ол дүйсенбі күні ресейлік әріптесі Сергей Лавровпен кездесуде.
Нямцэрэнгийн Энхтайван атап өткендей, оның Ресейге сапары Моңғолияның жаңа үкіметі мүшесінің алғашқы сапары болып табылады. «Бұл біздің моңғол-ресей қарым-қатынастарының дамуына қаншалықты жоғары мән беретінімізді көрсетеді», — деп толықтырды министр.
Лавров екіжақты қарым-қатынастар пандемияға байланысты шектеулерге қарамастан дамып келе жатқанына назар аударды. «Бүгін біз екіжақты байланыстардың барлық мәселелері бойынша және халықаралық аренадағы өзара іс-қимылымыз бойынша егжей-тегжейлі әңгімелесіп, президенттеріміздің уағдаластықтарын одан әрі дамытудағы қадамдарды белгілейміз деп үміттенемін», — деді ол.
Естеріңізге сала кетейік! Ресей 11 тамызда коронавирусқа қарсы вакцинаны әлемде бірінші болып тіркеді. Ол «Спутник V» деген атауға ие болды. Препаратты РФ Денсаулық сақтау министрлігінің Н.Ф. Гамалеи атындағы Эпидемиология және микробиология ұлттық зерттеу орталығы әзірледі және маусым және шілде айларында клиникалық сынақтан өтті. Препарат белгілі платформаға негізделген, онда тағы бірқатар вакциналар жасалған. 15 тамызда жаңа вакцинаның алғашқы партиясы өндірілді.