Жергілікті БАҚ хабарлағандай, кеше, 18 тамызда елордадан 20 шақырым қашықтықта орналасқан Кати әскери базасында бүлік басталды. Қарулы сарбаздар мен офицерлер Бамакоға барып, президент пен премьер-министрді тұтқындады.
Кейбір хабарларламарға қарағанда, төменгі жалақыға наразы әскер бөлімдері бүлік бастап отыр.
Wakat Sera порталының мәліметінше, Мали Қарулы Күштерінің бас штабы Кати базасындағы әскери мектептің экс-директоры, полковник Садио Камара бастаған Ұлттық ұлан сарбаздарының бақылауында. Мали ҚК жоғары қолбасшылығы тұтқындалғандар арасында деген деректер бар.
Le Journal du Mali жазуы бойынша, белгісіз адамдар Ұлттық ассамблея төрағасы Мали Мұса Тимбине мен экономика және қаржы министрі Абдулай Даффені тұтқынға алған. Al Jazeera хабарлауы бойынша, әскери қызметшілер қамауға алынуда — бірнеше министр, оның ішінде СІМ басшысы да ұсталды.
Financial Afrik хабарлауынша, Бамакода барлық мемлекеттік мекемелер мен банктер жабылған.
Мали қорғаныс министрлігінің ресми өкілі Associated Press агенттігіне «елде толығымен алауыздық басты» деп мәлімдеді.
Bamada жаңалықтар порталының жазуынша, Малидегі бүлікшілер Мали президенті Ибраһим Бубакар Кейта жергілікті уақыт бойынша сағат 14: 00-ге дейін (МСК 17:00) елден кетуі тиіс деп мәлімдеген. Олай болмаған жағдайда олар оның Себеникородағы резиденциясына шабуыл жасауға уәде берген.
Мали Премьер-Министрі Бубу Сиссе бүлікті көтерген әскери қызметшілерді тынышталып, диалогқа кірісуге шақырды.
20:10-да бүлікшілердің басшылары президент пен премьер-министрдің тұтқындалғаны туралы мәлімдеді. Бұл ақпаратты кейінірек министрлер кабинеті растады. Le Journal du Mali мәліметінше, президент пен үкімет басшысы Катидің армия базасына жеткізілген.
Әскери базада бірнеше сағат қамауда болған соң, Мали президенті өзінің отставкаға кеткенін, сондай-ақ үкімет пен парламенттің таратылғанын жариялады.
Малиде бүлік шығарған әскерилер Халықты құтқару ұлттық комитетінің құрылғанын жариялады. Әуе күштері штаб бастығының орынбасары Мали Исмаэль Ваге жергілікті теледидар эфирінде сөйлеген сөзінде Бамаконың барлық халықаралық міндеттемелерін орындауды жалғастыратынына сендірді.
19 тамызға қараған түні Бамакода мемлекеттік мекемелер мен кеңселердің қирауы басталды. Le Journal du Mali газетінің жазуынша, топ үкімет ғимараттарына басып кіріп, тонаумен айналысқан.
Көктемнен бері Кейтаның отставкаға кетуін талап етіп жаппай акциялар өткізген оппозициялық «5 маусым қозғалысы — Патриоттық күштер бірлестігі» әскери бүлікке қатысы жоқтығын жариялап, Бамаконың бас алаңында ауқымды митинг өткізді. Оппозиционерлер жұма күні наразылықтарын жалғастыратынын мәлімдеді.