Сүңгуір қайықтарға қатысты жанжалға байланысты Ұлыбритания мен Франция Сыртқы істер министрлері кездеспейтін болды.
Франко-британ кеңесінің тең төрағасы Питер Рикеттс ұйымның отырысы да өтпейтінін хабарлады.
Франция сүңгуір қайықтарға қатысты жанжалға байланысты қорғаныс министрі Флоранс Парли мен британдық әріптесі Бен Уоллеспен кездесуін болдырмау туралы шешім қабылдады. Бұл туралы Agence France-Presse басылымына жексенбі күні кешке француз әскери ведомствосындағы дереккөзі хабарлады, бұл осыған дейін британдық The Guardian газетінде жарияланған ақпаратты растады.
Келесі аптада Лондонда өтетін Ұлыбритания мен Франция әскери ведомстволары басшыларының кездесуі Австралияның АҚШ пен Біріккен Корольдіктің бірлескен жобасының пайдасына француз сүңгуір кемелерін сатып алудан бас тарту туралы шешімінен туындаған дау-дамайға байланысты өтпейтін болды.
Уоллес Лондонда Парлимен келіссөздер жүргізуі керек болған. Министрлер қос елдің әскери басшыларының бірге Франко-британ кеңесінің отырысына қатысуы керек еді — 1972 жылы екі ел арасындағы байланысты нығайту үшін құрылған тәуелсіз ұйым. The Guardian кеңестің тең төрағасы Питер Рикеттс мәлімдегендей, отырыс өтпейтін болды.
15 қыркүйекте Аустралия AUKUS қорғаныс және қауіпсіздік саласында Ұлыбритания және АҚШ-пен серіктестік орнатқанын жариялады. Келісім аясында Аустралия америкалық және британдық технологиялардың көмегімен кем дегенде сегіз атом сүңгуір қайығын құрастыруды жоспарлап отыр.
Сүңгуір қайыққа қатысты келісім аясында Париж АҚШ пен Аустралиядағы елшілерін консультация жасау мақсатында кері шақыртып алатынын жариялады. Француз тарапы Ұлыбританияның әрекетін «оппортунизмнің көрінісі» деп сипаттады.