Маусым айында биржада Ұлттық қордағы валюта саудасы мамыр айымен салыстырғанда қысқарту жоспарлануда. Бұл доллар бағамына қалай әсер етеді деген сұрақ туындап отыр.
Мамырда доллардың теңгеге қатысты бағамы шамалы төмендегені байқалды. Теңге бағамы 1,2%-ға нығайып, бір доллар үшін 447,71 теңгеге жетті. Бұл ұлттық валютаға қолдау көрсеткен салық төлемдерінің кезеңі аясында болды, деп хабарлайды Ұлттық банктің баспасөз қызметі.
Квазимемлекеттік сектор субъектілерінің валюталық түсімді сатуы өткен ай ішінде шамамен 323 млн АҚШ долларын құрады. Ұлттық қордан республикалық бюджетке трансферттерді қамтамасыз ету үшін валюта сату мамырда 800 млн АҚШ долларын құрады. Ұлттық қордан сату үлесі жалпы сауда-саттық көлемінің 28%-ын және күніне 40 млн АҚШ долларынан аспайтын мөлшерді құрады.
Маусымда Ұлттық қордан сатудың нақты көлемі Қаржы министрлігінің республикалық бюджетке трансферттер бөлуге арналған өтінімдеріне байланысты болады. Қаржы министрлігінің қолда бар болжамдық бағдарлары негізінде қажетті трансферттер сомасы бойынша Ұлттық Банк алдын ала маусымда Ұлттық қордан 500 млн АҚШ долларынан 550 млн АҚШ долларына дейінгі мөлшерде валюта сатуды жоспарлап отыр. Маусымда БЖЗҚ зейнетақы активтерінің валюталық үлесін ұстап тұру үшін валюта сатып алу 200 млн АҚШ долларынан 250 млн АҚШ долларына дейінгі мөлшерде күтілуде.
Ұлттық Банк Ұлттық қордың қаражатымен операциялар жүргізу кезінде нарықтық бейтараптық қағидатын ұстанады. Бұл шетел валютасын үнемі және біркелкі сатуды білдіреді. Осы тәжірибе Ұлттық қор операцияларының валюта нарығына әсерін барынша азайтуға мүмкіндік береді.