Қазақстанның Еңбек және әлеуметтік қорғау министрі коронавирустық инфекцияның екінші толқыны басталған жағдайда мемлекеттің көмегіне мұқтаж қазақстандықтардың саны туралы мәліметтерді жариялады.
Атап айтқанда, ол мемлекеттік қолдауды 2,2 млн қазақстандық қажет ететінін, олар қиын материалдық жағдайға душар болатынын айтты.
«Коронавирустың екінші толқыны және шектеу шаралары қабылданған жағдайда, біздің бағалауымызша, 2,2 млн адам қолдауға мұқтаж болуы мүмкін. Болжам бойынша, жұмыспен қамтылған халықтың жартысына жуығы өз жұмыс режимін сақтап қалуы мүмкін, бұл 4 млн адам. Бұл негізінен ауыл шаруашылығы, құрылыс, өнеркәсіп, денсаулық сақтау салаларында жұмыс істейтін адамдар», — деді министр.
Ол жұмыс істейтін халықтың үштен бір бөлігі, шамамен 2,5 млн адам қашықтықтан жұмыс істеу режиміне қайта ауыса алатынын атап өтті. Жұмыс уақыты 2 млн адамға қысқаруы мүмкін.
«Олар ақылы немесе ақысыз демалысқа кетуі мүмкін. Бірінші кезекте сауда, көлік, тұру және тамақтану қызметтері саласының қызметкерлері болуы мүмкін. 162 мың адам жұмыссыз қалуы мүмкін», — деді Біржан Нұрымбетов.
Ол карантинді қайта енгізу қызметкерлердің босатылуына және олардың табыстарының төмендеуіне әсер ететінін атап өтті. Жұмыс орындарын сақтау және құру бойынша шаралар жұмыспен қамтудың жол картасы және «Еңбек» бағдарламалары бойынша қабылданады, онда субсидияланатын жұмыс орындарының көлемін ұлғайту жоспарлануда.
«Жұмыссыздар үшін жұмысынан айырылу кезеңінде төлемді арттыру бойынша ұсыныстар енгізу жоспарлануда. Біз дайындаған ұзақ мерзімді нәтижелі шаралар «Еңбек» бағдарламасын жұмыс орындарын құруға, соның ішінде кепілдендірілген сатып алу немесе кепілсіз несиелеу арқылы ауыл кәсіпкерлігі есебінен бағдарлауды қамтиды. Біз жұмыспен қамту саласындағы бірлескен жұмыстың нәтижелері жұмыссыздықтың әлеуметтік қолайлы деңгейін сақтап қалуға және халық табысының күрт төмендеуіне жол бермеуге мүмкіндік береді деп күтудеміз», — деп қорытындылады сөзін Еңбек министрлігінің басшысы.