Қазақстанда үкіметтік өкілеттіктердің бір бөлігін министрліктер мен жергілікті биліктерге беру туралы жоба қаралуда.
Мәжіліс депутаттары бірінші оқылымда мемлекеттік басқару деңгейлері арасындағы өкілеттіктерді қайта бөлу мәселелері бойынша заң жобасына енгізілген түзетулерді мақұлдады.
Құжатта жекелеген функцияларды үкіметтен орталық мемлекеттік органдарға, сондай-ақ орталық мемлекеттік органдардан жергілікті атқарушы органдарға беру көзделеді.
Қазақстанның ұлттық экономика министрі Әсет Ерғалиев заң жобасында 55 заңнамалық актіге, оның ішінде бес кодекс пен 50 заңға түзетулер енгізу ұсынылатынын хабарлады.
«Заң жобасы аясында 94 функция қайта бөлінеді, оның ішінде үкіметтен министрліктерге 89 функция, жергілікті атқарушы органдарға бес функция беріледі. Сонымен қатар, төрт мемлекеттік органға қосымша өкілеттіктер беріледі. Заң жобасын қабылдау мемлекеттік басқарудың тиімді жүйесін қалыптастырудағы кезекті қадам болады және оның дербестігін одан әрі арттыруға ықпал етеді», — деп хабарлады палатаның жалпы отырысында Ұлттық экономика министрі
Орталық мемлекеттік органдардың жауапкершілігін арттыру және қойылған мақсаттар мен міндеттерді уақтылы орындау мақсатында заң жобасында үкіметтен мыналарды беру көзделеді:
- мемлекеттік жоспарлау жөніндегі орталық уәкілетті органға стратегиялық жоспарды іске асыру туралы есепті жасау және ұсыну тәртібін белгілеу жөніндегі өкілеттіктер;
- азаматтық қорғау саласында өрт қауіпсіздігі қағидаларын, сондай-ақ авариялық-құтқару жұмыстарын жүргізу үшін құтқарушыларды аттестаттау тәртібін бекіту жөніндегі функциялар;
- су қорын пайдалану мен қорғау, сумен жабдықтау, су бұру саласында республикалық меншіктегі су шаруашылығы құрылыстарын басқаруды ұйымдастыру жөніндегі құзыреті;
- автомобиль жолдары жөніндегі мемлекеттік органға автомобиль жолдарымен жүруге арналған автокөлік құралдарының рұқсат етілген параметрлерін белгілеу жөніндегі функциялар;
- геодезия және картография саласында аэротүсірілім жұмыстарын жүргізуге рұқсаттарды тіркеу, есепке алу және беру қағидаларын әзірлеу және бекіту жөніндегі өкілеттік;
- халықтың санитариялық-эпидемиологиялық саламаттылығы саласында тамақ өнімдерінің қауіпсіздігін қамтамасыз ететін уәкілетті органдардың қызметін салааралық үйлестіру жөніндегі құзыреттер.
Атап айтқанда, орталық мемлекеттік органдарға аэротүсірілім жұмыстарын жүргізуге тіркеу, есепке алу және рұқсат беру ережелерін бекіту, ұлттық табиғи парктерде туристік және рекреациялық қызметті жүзеге асыру ережелерін бекіту, сондай-ақ авариялық-құтқару жұмыстарын жүргізу үшін құтқарушыларды аттестаттау тәртібін айқындау бойынша функциялар беріледі.
Облыстық ономастикалық комиссиялары мен республикалық маңызы бар қалалардың, астананың ономастикалық комиссияларының қызметін үйлестіру; кіреберістерде жол ақпараттық белгілерін орнату.
Палата депутаттары бірінші оқылымда заң жобасын мақұлдады.