Алматы облысы Талғар қаласы маңында орналасқан Кендала ауылында жаңа бас жоспарды талқылаудың соңы «дау» мен «шуға» ұласты. kris_p_talgar парақшасында жарияланған видеода қоғамдық тыңдаулар соңы дау пен хаосқа ұласқаны көрінеді.
Жергілікті билік Кендала ауылдық округінің саяжайларына ауыл мәртебесін беретінін айтып, жаңа бас жоспарды ұсынды. Алайда үйлері сүрілетін тұрғындар өтемақы мөлшерін нақты айтпағанын атап өтіп, наразылық білдіруде.
Қоғамдық тыңдауды ұйымдастырушылар дауыс беруді өткізу туралы шешім қабылдады. Видео авторларының айтуынша, дауыс беру өткізілетіні туралы бір күн қалғанда хабарланған.
Жиналысқа саяжайларға қатысы жоқ көптеген адамдар жиналған, кейбірі арандатушылық әрекет еткені үшін сынға ұшырады. Видеода саяжай алабында жылжымайтын мүліктің меншік иесі емес адамдардың дауыс беруге қатысқаны көрінеді, бұл саяжай тұрғындарының шамына тиіп отыр. Пікір қалдырғандардың бірі: «Неліктен билік өкілдері меншік иесінің құқығын бұзады?» — деп назын білдірді.