Bank RBK-ны басқарған және 144 млрд теңге жымқырды деп айыпталған экс-банкир өз кінәсін толық мойындап, жасаған әрекетіне өкінді.
Алмалы аудандық сотының баспасөз қызметі хабарлағандай, Ертаев қылмыстық істі тергеуге көмектесіп, шығынды ішінара өтеді, және кәмелетке толмаған балалары бар. Айыптау осы мән-жайларды ескере отырып, оған мерзім сұрады.
Прокурор аса ауыр жаза мен онша ауыр емес жазаны біріктіру арқылы 11 жылға соттаумен бірге мүлкін тәркілеу, 5 жыл материалдық жауапкершілікпен байланысты коммерциялық және қаржы қызметінен айналысу құқынан айыру, жазасын орташа қауіпсіздіктегі қылмыстық-атқару жүйесі мекемесінде жазасын өтеуді талап етті, — делінген Алмалы аудандық сотының баспасөз қызметінің хабарламасында.
Одан басқа іс бойынша тағы 36 адам өтіп жатыр. Прокурор ескіру мерзімі аяқталуына байланысты екі сотталушыны қылмыстық қудалауды тоқтатуды сұрады, тағы бір сотталушыға қатысты адамның қайтыс болуына байланысты қудалауды тоқтатуды сұрады.
Айыптаушы тарап төрт жылға бас бостандығын шектеуді, қалғандарына 1 жылдан 8 жылға дейін бас бостандығынан айыруды сұрады.
Жомарт Ертаев Bank RBK-ға тиесілі 144 миллиард теңгені жымқырды деп айыпталуда. Тергеу мәліметтері бойынша, банкир қызмет бабын пайдалана отырып, 2011-2017 жылдар аралығында бұл соманы ұрлап алған.
2019 жылы қазақстандық биліктің сұрауы бойынша Жомарт Ертаев Мәскеуде ұсталды. Оның босқын мәртебесі жойылып, Мәскеу қалалық соты Ертаевты Қазақстанға экстрадициялау туралы шешім қабылдады.
