Нұрсұлтан Назарбаев Nur Otan — Jas Otan партиясы жастар қанатының V съезіне қатысты. Қазақстанның Тұңғыш Президенті тәуелсіздік жылдарындағы негізгі жетістіктерге тоқталып, осы жолда үлкен жұмыс атқарылғанын атап өтті.
«Мен бүгінгі таңда күллі қазақстандықтар мақтан тұтатын табыстарымызға жету қаншалықты қиын болғанын жақсы білемін. Өскелең ұрпақ қолда барды қадірлеуге, Отанымыздың әрі қарай өркендеуін ойластыруға, өз елін мақтаныш етуге тиіс. Жастар мүддесі әрдайым менің басты назарымда», — деді Nur Otan партиясының төрағасы.
Қазақстанның Тұңғыш Президенті тәуелсіздік жылдары елімізде нақты және тиімді әлеуметтік лифттер құрылғанын атап өтті.
«Менің бастамаммен ел үшін ең күрделі кезеңде іске қосылған «Болашақ» бағдарламасымен 15 мыңға жуық жас қазақстандық білім алды. Бес жыл бұрын Назарбаев Университеті студенттерінің алғашқы легі түлеп ұшты. Осы жылдардың ішінде оқу орнында бес мыңға жуық маман даярланды. Мемлекет іске қосқан әлеуметтік лифттердің арқасында мыңдаған жас қазақстандық табысқа жетті», — деді Нұрсұлтан Назарбаев.
Nur Otan партиясының төрағасы жастар қанатының мүшелеріне пандемия кезіндегі қайырымдылық акциялары мен еріктілер қызметіне белсенді атсалысқаны үшін алғысын білдірді.
Қазақстанның Тұңғыш Президенті жастардың белсенділігі әрдайым саяси процестің қозғаушы күштерінің бірі болғанына назар аударды.
«Қазіргі кезде жігерлі әрі бастамашыл болудың маңызы ерекше. Өйткені біз тез өзгеріп жатқан әлемде өмір сүріп отырмыз. Көпшілікке таныс өмір салты артта қалғаны сөзсіз. Технологиялар мүмкіндіктеріміздің әлеуетін айтарлықтай арттыруда, — деді Нұрсұлтан Назарбаев.
Елбасы елді дамыту және Қазақстанның тәуелсіздігін нығайту ісіне жастардың белсене атсалысуының маңызын атап өтті.