Батыс Қазақстан облысының Орал қаласында жыл сайынғы «Қазақстанның үздік тауары» өңірлік көрме-байқауы өтті, оған 40 жергілікті тауар өндіруші қатысты. Сондай-ақ, 15 кәсіпкер «Бір ауыл — бір өнім» жәрмеңке-көрмесінде өз тауарларын ұсынды.
Өңірлік іс-шара жергілікті өндірушілерді қолдауға, тауарлар мен қызметтердің сапасын арттыруға, сондай-ақ отандық брендтерді ілгерілетуге және өңірде өндірісті дамытуға бағытталған. Іс-шараның ұйымдастысы БҚО Кәсіпкерлер палатасы мен облыс әкімдігі, олар мұндай көрмелердің жергілікті бизнесті дамытудағы және өндірушілердің басын қосу маңызды екенін атап өтті.
Көрмеде азық-түлік өнімдерінен бастап, қолдан жасалған туындылар және ауыл шаруашылығы өнімдері ұсынылды. Қатысушылар қатарында шұжық өнімдерін, сүт өнімдерін, бал, балық өнімдерін және басқа да тауарларды өндірушілер болды. Жергілікті зауыттар мен арнайы киім тігетін цехтар да өз өнімдерін ұсынды.
Сарапшылардан құралған комиссиясының қорытындысы бойынша «Халық үшін ең жақсы тауар», «Өндірістік мақсаттағы үздік тауар» және «Үздік азық-түлік тауары» номинациялары бойынша жеңімпаздар анықталды. Жеңімпаздарға диплом мен бағалы сыйлықтар табыс етілді. Олар өз өнімдерін Астана қаласында өтетін «Қазақстанның үздік тауары — 2023» республикалық көрме-байқауында ұсынуға жолдама алды, бұл олардың өнімдері үшін нарықты кеңейтуге және отандық брендтерді нығайтуға ықпал етеді.
Іс-шара кәсіпкерлерге тәжірибе алмасуға және бизнесті дамытудағы жаңа тенденциямен танысуға септігін тигізеді. Көрме кәсіпкерлер қауымдастығын нығайтуға және қазақстандық тауарлар мен қызметтерге қызығушылықты арттыруға ықпал етеді.