Жамбыл облысы Қызылқайнар, Жасөркен, Жалпақтөбе, Қызылдиқан және Гродеково елді мекендерінде магистральды газ құбыры жарылуына байланысты 980 үй, сондай-ақ мектептер, балабақшалар мен медициналық мекемелерді қоса алғанда 8 әлеуметтік нысанды газсыз қалды. Бұл Гродеково ауылының жергілікті тұрғындарының наразылығын тудырып отыр.
Апаттың себептерін анықтау және оның салдарын жедел жою үшін жергілікті билік, газ және шұғыл қызметтер өкілдерінен штаб құрды. Қазіргі уақытта 6 бригада мен 5 бірлік техника жұмылдырылды. Қалпына келтіру жұмыстары 10 жердегі дәнекерлеу жұмыстарын қоса алғанда, 4-5 сағатқа созылады деп күтілуде.
«Алдын ала болжам бойынша, апаттың салдарын жою 4-5 сағат жүргізіледі. 10 жерден дәнекерлеу жұмыстарын жүргіземіз. Оқиғаның себептері толық тексеруден кейін анықталады. Табиғи газдың болмауына байланысты 4 мектеп, 2 балабақша және 2 медициналық нысанда жылыту жүйесі қатып қалмауы үшін жанар жағармаймен жұмыс істейтін арнайы құрылғы насостармен олардың жылу жүйесін айналдырып жатыр», — деп атап өтті Жамбыл облысы әкімінің орынбасары Қанатбек Мәдібек.
Айта кету керек, соңғы демалыс күндері де Қазақстанның бірнеше қалаларындағы жылумен жабдықтау жүйелерінде іркіліс байқалды. Энергетика министрлігі өкілдерінің айтуынша, қалалардағы орын алған оқиғалар технологиялық бұзушылықтарға байланысты болып отыр, бұл тұтынушыларға жылумен қамтамасыз етуде залал келтірілмеді. Осы жылы еліміздің барлық энергия көздерінде тұрақты жылумен жабдықтауды қамтамасыз ету үшін айтарлықтай көлемде жұмыстар жүргізілді.
Артынан электр энергетикасы, ЖЭО және ЖЭК үшін жауапты энергетика вице-министрі Жандос Нұрмағанбетов өз қызметінен кететіні белгілі болды. Оның қызметінен кетуі болашақта энергетикалық мәселелерді стратегиялық басқару мәселесіне әсер етуі мүмкін.