Қазақстанның Тұңғыш Президенті Нұрсұлтан Назарбаев Nur Otan партиясы праймеризінің онлайн-дауыс беруіне қатысты. Бұл туралы Елбасының баспасөз хатшысы Айдос Үкібай өзінің Twitter парақшасында хабарлады.
«Nur Otan партиясының төрағасы Нұрсұлтан Назарбаев праймеризде онлайн-дауыс беруге қатысты. Дауыс беру алдында Елбасы ішкі партиялық іріктеуге қатысушылардың үгіт-насихатын және жария пікірталастарын мұқият қадағалағанын атап өтті. Қазақстанның Тұңғыш Президенті партия назарға алуы тиіс көптеген сындарлы ұсыныстар айтылғанын атап өтті», — деп жазды Айдос Үкібай.
Ол Нұрсұлтан Назарбаев барлық партия мүшелерін дауыс беруге белсене қатысуға шақырғанын айтты.
Естеріңізге сала кетейік, 1 қазаннан (00.00) бастап 3 қазанға дейін (14.00) мобильді қосымша және арнайы веб-портал арқылы электрондық дауыс беру өткізіле бастады.
Дауыс берудің соңғы күні (3 қазан) бастауыш партия ұйымдарының базасында сайлау учаскелері ашылды. Интернет жоқ елді мекендерде қағаз бюллетеньдер бойынша дауыс беруге болады.