Дүниежүзілік денсаулық сақтау ұйымы коронавирустық инфекцияны емдеуге арналған тағы бір препаратты мақұлдады.
Аталып өткендей, ұйым моноклональді антиденелерге жататын тоцилизумабты коронавирусты жұқтырған науқастарды емдеуге арналған препараттар тізіміне енгізді. Бұл ДДСҰ COVID-19-ға қарсы күрес үшін мақұлдаған алтыншы препарат.
«COVID-19-дың ауыр немесе өте ауыр түріне шалдыққан пациенттердің денсаулыққа елеулі зиян келтіруі мүмкін иммундық жүйесінің реакциясы шектен тыс болады. Мұндай шектен тыс иммундық реакцияны интерлейкин-6 ингибиторлы препараттар, оның ішінде тоцилизумаб басады. Емдеудің стандартты схемасымен салыстырғанда бұл препараттар аурудың ауыр немесе өте ауыр түрін жұқтырған пациенттерге өлім ықтималдығын 13 пайызға төмендетуге мүмкіндік береді», — деп атап өтті БҰҰ жаңалықтары.