Үкімет отырысында сөйлеген сөзінде ҚР Ұлттық экономика министрі негізгі көрсеткіштер туралы есеп берді. Руслан Дәленов ел дамуының әлеуметтік-экономикалық деректері жыл басымен салыстырғанда жақсарғанын атап өтті.
Атап айтқанда, ол қыркүйекте үрдістің оң жаққа қарай өзгеруі байқалғанын хабарлады.
Қызмет көрсету саласындағы белсенділік қайта жанданды. Нақты секторда өсу сақталып отыр. Қыркүйекте экономиканың жанданғаны байқалады, оң өсімі бар салалар саны артты. Нәтижесінде жедел деректер бойынша ЖІӨ өсу қарқыны 8 айдағы минус 3%-дан қаңтар-қыркүйекте минус 2,8%-ға дейін жақсарды, – деп хабарлады Дәленов.
Оның айтуынша, жылдық инфляция 7% деңгейінде сақталған. Нақты секторда 2,2% құрап, оң өсу жеделдеді.
“Нақты сектордың барлық салалары мен қызметтердің жекелеген түрлері өсімнің оң қарқынын көрсетеді. Бұл құрылыс – 10,5%, ақпарат және байланыс – 8,2%, ауыл шаруашылығы – 5%, өңдеу өнеркәсібі – 3,3%. Көлікте – 17,1%, саудада – 9,5%, әкімшілік қызмет көрсетуде – 4,9%, жылжымайтын мүлікпен операцияларда – 4,3%, тұру және тамақтануда – 3,6% төмендегені байқалды. Бұл 9 айдағы көрсеткіш”, – деп нақтылады ведомство басшысы.
Өңірлерге келетін болсақ, аймақтық бөліністегі жалпы жағдай 7 экономикалық көрсеткіш бойынша мынадай.
“5 көрсеткіш бойынша 7 өңірде оң өсім байқалады. Олар Ақмола, Алматы, Жамбыл, Қостанай, Павлодар және Солтүстік Қазақстан облыстары, сондай-ақ Шымкент қаласы. Сонымен бірге, 7 өңірде 4 көрсеткіш бойынша өсім байқалды. Бұл орташа деңгей. 3 өңірде оң өсім тек 3 көрсеткіш бойынша байқалады. Бұл Атырау, Батыс Қазақстан және Қызылорда облыстары”, – деп түйіндеді Дәленов.
