Украинадағы соғыс ерте ме, кеш пе аяқталады, содан кейін Ресей өз жасаған қылмыстары үшін залалды өтеуі тиіс болады, деп есептейді батыстық саясаттанушылар. «Ол уақытта Путин билік басында болатыны не болмайтыны белгісіз, бірақ қаржылық ауыртпалықты Ресей бюджеті көтереді. Кремль насихатшылары, саясаткерлер мен шенеуніктер Ресей репарация төлемейді деп мәләмдеуде. Ресейді мәжбүрлеу өте қиынға соғады. Бірақ батыста бұғатталған ресейлік активтер қолданылуы мүмкін. Батыс Ресейдің жүздеген миллиард долларын Украинаны қалпына келтіру үшін жіберуге заңды жолдарын іздеп жатыр», — деп жазады олар.
Хабарланғандай, Батыста бұғатталған ресейлік активтер негізінен «лас жолмен» келген ақша. «Бұл мемлекеттік бюджеттен ұрланған оффшорлар арқылы «жасырылған» ақша, оны көбісі Кремльге бағынысты ресейлік құқықтық жүйе тәркілемес үшін шетелдік еуропалық банктерде сақтағанды жөн көреді. Бірақ батыс демократиясы мен заң үстемдігі бұғатталған ресейлік активтерді оңай тәркілеуге жол бермейді. Ол үшін заңды негіз қажет және тіпті мемлекет басшыларының заңға қайшы келуге құқығы жоқ, себебі олар бұл үшін жауап береді. Батыстық жүйе осындай әрекетімен Ресейден ерекшеленеді», — дейді сарапшылар.
Politico басылымының есептеуінше, Батыстағы түрлі банктерде 300 миллиард доллардан астам сомада бұғатталған ресейлік қаражат бар. 200 миллиардқа жуық қаражат Еуропада, қалғаны АҚШ пен Канадада бұғатталды. Батыс саясаткерлері аталған қаражатты Украинаға көмек көрсету үшін немесе қираған инфрақұрылымды соғыстан кейін қалпына келтіру үшін Киевке беру мәселесін қарастыруда. Еуропадағы саясаткерлер неліктен әлі күнге дейін аталған активтер Украинаға берілмеді деп бас қатырып отыр.
2023 жылы жазда Еуроодақтың жұмыс тобы РФ активтерін тәркілеудің заңды жолы жоқ деген қорытындыға келді. Осыдан кейін ЕО Украинаны қалпына келтіру үшін тәркіленген қаражатты беру үшін бұғатталған қаражатты реинвестициялау нұсқасын қарастырып жатыр. Financial Times басылымы соңғы апталарда АҚШ Ресей активтерін тәркілеу бойынша халықаралық құқыққа сәйкес келетін жолды ұстанатынын жазды. Басылымның болжамынша, Ресейдің Украинаға қарсы соғысы басталғалы екінші жылдығына орай өтетін G7 саммитінде активтерді тәркілеу мәселесі талқыланады.
Путин Украинаға заңсыз баса көктеп кіруі ресейлік активтерді тәркілеуге негіз болып отыр. Аталған ақша Ресейдің қолына түспеу керек, себебі оны соғысты жалғастыру үшін пайдаланады. Батыс елдерінің салық жүйесіне түсетін жүктемені жеңілдету және Украинаға берілетін әскери көмек сомасын азайту, сонымен қатар әскери және қаржылай көмектің санын азайтпау үшін Батыс Киевке ресейлік активтерді беру нұсқасын қарастыру керек. Батыс Путиннен қорықпай, батыл қадамға баратын болса, Ресейді жеңу мүмкін болады. АҚШ прецедент жасауы тиіс, содан кейін ЕО елдеріне осындай шешім қабылдау оңайға соғады.