Ақ үйдің хабарлауынша, АҚШ президенті Байденнің РФ президенті Путинмен кездесуі жоспарланып отырған жоқ.
Бұл туралы сәрсенбі, 12 қазан күні Ақ үйдің баспасөз хатшысы Карин Жан-Пьер мәлімдеді.
«Қайталап айтамын, ол Владимир Путинмен кездесуді жоспарлап отырған жоқ», — деді ол Вашингтоннан Колорадо штатына келген Байденнің ұшағының бортында журналистерге арналған брифингте.
Бұл ретте Жан-Пьер АҚШ әкімшілігі Мәскеумен тұтқындар алмасу мәселесіне қатысты байланысын жалғастырып жатқанын айтты.
«Президент [Байден] Ресей біз ұсынған маңызды ұсынысты қабылдайтынына немесе келіссөз жүргізу үшін ұтымды ұсыныс жасауға тиіс екеніне сенімді», — деп атап өтті ол.
11 қазанда Байден CNN телеарнасына берген сұхбатында Индонезияда өткен «Үлкен жиырмалық» (G20) саммитінде Путинмен кездесудің мәні жоқ деп санайтынын мәлімдеді. Сонымен қатар, ол сотталған баскетболшы Бриттни Грайнерді АҚШ-қа қайтару мәселесін талқылауға дайын екенін айтты. Байденнің айтуынша, Путин тиісті ұсыныс жасаса ғана онымен кездеседі.
Өз кезегінде Кремльдің ресми өкілі Дмитрий Песков РФ мен АҚШ көшбасшыларының келіссөз жүргізуі үшін тараптардың ешқайсысы бастамашы болмағанын атап өтті. Ол келіссөздерде көтерілетін мәселені тек гипотетикалық түрде талқылауға болатынын атап өтті, себебі оларды ұйымдастыру үшін әлі ешкім күш-жігерін салмады.
Ресей сыртқы істер министрі Сергей Лавров АҚШ тарапынан G20 саммитінде Путин мен Байденнің кездесуі туралы ұсыныс түсетін болса, Мәскеу оны қарастыратынын мәлімдеді.
G20 саммиті 15-16 қарашада Индонезияда Бали аралында өтеді.
Путин мен Байден арасындағы соңғы келіссөз 2021 жылдың желтоқсан айында онлайн-форматта өтті. Келіссөз қауіпсіз бейнебайланыс арнасы арқылы жабық режимде өтті, ол екі сағатқа созылды. Кремль президенттердің онлайн-кездесуі ашық әрі іскерлік сипатта болғанын мәлімдеді.