Батыс Қазақстан облысында «Рожковское» ірі газ конденсаты кен орны өнеркәсіптік пайдалануға берілді. Салтанатты ашылу рәсіміне Қазақстан Республикасының Премьер-Министрі Әлихан Смайылов қатысып, бұл жобаның ұлттық энергетика үшін стратегиялық маңыз барын атап өтті.
Газ конденсаты кен орны 2008 жылы кең ауқымды геологиялық барлау жұмыстарының нәтижесінде ашылды. 2040 жылға дейін мұнда 14,2 млрд текше метр шикі газ және 7,1 млн тонна конденсат өндіру жоспарланып отыр.
«ҚазМұнайГаз» (50%), мажарстандық MOL Group (27,5%) және қытайлық Sinopec (22,5%) компаниялары кіретін бірлескен кәсіпорын жер қойнауын пайдалану құқығына ие. Бүгінгі таңда шамамен $534 млн инвестицияланды.
Әлихан Смайылов ”Рожковское” кен орны қосымша табиғи газ көзіне айналатынын айтты. Кен орнында өндірілетін шикізат “Жайықмұнай” компаниясында өңделетін болады. Аталған жоба шетелдік компаниялармен серіктестікте жүзеге асырылып отыр, ол қажетті жобалық шешімдерді дайындау мен қолдану барысында озық халықаралық тәжірибені қолдануға мүмкіндік берді.
Үкімет басшысы орта мерзімді перспективада «Орталық Өріктау», «Батыс Прорва» және «Қаламқас» сияқты тағы бірнеше газ жобасы іске қосылатынын айтты.