«Ашық НҚА» порталында ҚР Денсаулық сақтау министрлігінің Қазақстанда кейбір дәрі-дәрмектің бағасын көтеру мүмкіндігі туралы бұйрығы жарияланды. Алайда Денсаулық сақтау министрі Ақмарал Әлназарова бұл бұйрықты іске асыру қоғамда наразылық туындауы мен қажетті дәрі-дәрмектерге қолжетімділік қиындау қаупіне байланысты уақытша тоқтатылғанын мәлімдеді.
Жобаның дерегі бойынша парацетамол, йод, цефазолин, ампициллин және бисакодил сияқты препараттардың бағасы сәйкесінше 2,5, 2,1, 2, 1,325 және 2,3 есеге өсуі мүмкін.
«Бұл 1728 препараттың арасында халық жиі сатып алатын және сұранысқа ие антигистаминді, антибиотикті және жөтелге қарсы дәрілер бар. Біз қазіргі уақытта ықтимал жағымсыз салдарларға толық зерттеу жүргізіп жатырмыз және осы бұйрықты уақытша тоқтаттық», — деп мәлімдеді Ақмарал Әлназарова.
Бұған дейін Қазақстан Еуразиялық экономикалық одақ елдері арасында дәрі-дәрмек бағасының өсімі бойынша көш бастап тұрғаны айтылған. Елімізде мамыр айында дәрі-дәрмек бағасының жылдық өсімі 11% -ды құрады, ал ЕАЭО-да орташа көрсеткіш небәрі 4,2%-ды құрайды. Сонымен қатар, ҚР Денсаулық сақтау министрлігі дәрі-дәрмек бағасының өсуі норманың шегінде екенін атап өтті.