ҚР Парламенті Сенатының депутаттары өлім жазасының күшін жоюға бағытталған Азаматтық және саяси құқықтар туралы халықаралық пактіге екінші факультативтік хаттаманы ратификациялау туралы заң жобасын қабылдады. Бұған дейін мәжіліс хаттаманы ратификациялауды мақұлдады.
Хаттама Қазақстанның өлім жазасын алып тастау жөніндегі халықаралық міндеттемелерді қабылдауына бағытталған. Осы халықаралық құжатқа сәйкес қол қоюшы елдер келесі міндеттемелерді қабылдайды:
- Өлім жазасын қолданбау.
- Өз юрисдикциясы шеңберінде өлім жазасын алып тастау үшін барлық қажетті шараларды қабылдайды.
Қазақстан соғыс уақытында адам әскери сипаттағы аса ауыр қылмыстар жасағаны үшін кінәлі деп танылғаннан кейін өлім жазасын қолдану құқығын өзіне қалдырады.
Қазақстанның БҰҰ жанындағы өкілі Қайрат Омаров 2020 жылғы 24 қыркүйекте Азаматтық және саяси құқықтар туралы халықаралық пактіге екінші факультативтік хаттамаға қол қойды. 20 желтоқсанда Конституциялық кеңес Қазақстан президенті Қасым-Жомарт Тоқаевтың сұрағына берген жауабында хаттаманы ратификациялау үшін ҚР Конституциясына өзгерістер енгізудің қажеті жоқ деп мәлімдеген.
Қазақстанда өлім жазасына мораторий 2003 жылы 17 желтоқсанда еліміздің Тұңғыш Президентінің жарлығымен енгізілді.
