Қазақстанда шикізат ресурстарына тәуелділікті төмендету стратегиясы аясында экономиканың шикізаттық емес секторларына жалпы сомасы 1,6 трлн теңгеге үш жүзден астам жобаны пайдалануға беріледі деп күтілуде. Жобалар өңдеу өнеркәсібін, автомобиль өндірісін және тұрмыстық техника өндірісін қоса алғанда, түрлі салаларды қамтиды.
Премьер-Министр Әлихан Смайылов «24KZ» мемлекеттік арнасына берген сұхбатында диверсификация процесінің қарқындылығы күшейіп келе жатқанын және Қазақстан экономиканың шикізатқа тәуелділігін жоспарлы түрде азайтып. жатқанын атап өтті. Мысалы, Саран индустриалды аймағында қуаты 1,1 млн тұрмыстық техника шығаруға жететін өндіріс іске қосылды. Қостанай облысында қуаты жылына 70 мың автомобиль болатын терең локализацияланған жаңа Kia автомобиль зауытының құрылысы басталды.
Экономиканы жаңғырту аясында Жетісу облысында қыш плиталар өндіретін зауыт жаңғыртылып, кеңейтілді, бұл аталған тауардың импортын азайтуға мүмкіндік береді.
«Келесі жылы жалпы құны 4,6 трлн теңгені құрайтын 400-ден астам жобаны іске қосуды жоспарлап отырмыз. Осылайша, әртараптандыру процесі жеделдеп, біз экономиканың шикізатқа тәуелділігін жоспарлы түрде азайтамыз», — деп түйіндеді Үкімет басшысы.
Шикізатты ішкі өңдеушілерді нарықтан төмен бағада шикізатпен қамтамасыз ету тетігі іске қосылды. Сонымен қатар, өңдеу өнеркәсібіндегі жаңа өндірістер салықтан үш жылға дейін босатылады.