2020 жылғы желтоқсанда кәсіпорындар арасында жүргізілген сауалнама нәтижелері бойынша Қазақстанда іскерлік белсенділік индексі 0,4 пайыздық тармаққа – 49,0-ге дейін төмендеген. Бұл туралы Ұлттық банктің Ақша-несие саясаты департаментінің директоры Жандос Шаймарданов айтты.
“Индекстің төмендеуі көбіне құрылыстағы көрсеткіштің 3 тармаққа – 49,5-ке дейін төмендеуіне байланысты. Қызмет көрсету саласында іскерлік белсенділік индексі 48,0 деңгейінде қалыптасты (2020 жылғы қарашада – 48,7). Бұл ретте өнеркәсіп саласындағы іскерлік белсенділік 2020 жылғы қаңтардан кейін алғаш рет оң аймаққа өтіп, 50,3-ті (2020 жылғы қарашада – 49,6) құрады”, – деді ол.
Желтоқсанда өңірлер бөлінісінде көрсеткіштер Қостанай, Маңғыстау және Шығыс Қазақстан облыстарында жақсарды. Индекстің айтарлықтай нашарлауы Ақтөбе және Батыс Қазақстан облыстарында байқалады.
Нақты сектор кәсіпорындары Қазақстанда бизнес жүргізу жағдайларын жақсартудың жалғасатынын атап өтті. Бизнес-ахуал индексі желтоқсанда 2020 жылы ең жоғарғы көрсеткіш 4,2-ге жетті.
Желтоқсан айында сауалнамаға 452 кәсіпорын қатысты: құрылыс саласында – 64, өнеркәсіп саласында – 172, қызмет көрсету саласында – 216.
