Қазақстанда Гугл салығын кім және қалай төлейді

Ұлттық экономика министрлігі елімізде келесі жылдан бастап енгізілетін Google салығын кім және қалай төлейтінін айтты.

2022 жылғы 1 қаңтардан бастап Салық кодексінің Қазақстан аумағында орналасқан жеке тұлғаларға сатылған тауарлары, көрсетілген қызметтері үшін шетелдік интернет-компаниялардың ҚҚС төлеу жөніндегі міндеттемелері туралы нормалары күшіне енеді, деп хабарлады Ұлттық экономика министрлігінің сайты.

Ведомствода түсіндіргендей, қызметтер мен тауарларды онлайн платформалар арқылы сататын барлық шетелдік компаниялар Қазақстан бюджетіне ҚҚС төлеуге міндетті болады. ҚҚС мөлшерлемесі сатылған тауарлар мен қызметтер сомасының 12%-ін құрайды. Мұның қазақстандық салық төлеушілерге қатысы жоқ.

«Төлем тәртібі өте қарапайым. Компаниялар салық салу мақсатында тіркелмейді.  Оңайлатылған тәртіпте салық органдарына хат жолдап, ҚҚС төлеуге дайын екендігі туралы хабарлайды», — деді ҰЭМ вице-министрі Азамат Амрин.

Әкімшілендіру шетелдік интернет-компаниялар аударған сомалар туралы екінші деңгейлі банктердің деректері негізінде жүзеге асырылады.

Әкімшілік мақсаттар үшін төлем жүйелерін пайдалана отырып, төлемді және/немесе ақша аударымын алушы ретінде шетелдік компанияны сәйкестендіретін белгілердің бірегей жиынтығы болып табылатын Merchant ID немесе MID ұғымын белгілеу ұсынылады.

Merchant ID шетелдік интернет-компаниялар беретін реквизиттердің бірі болып табылады. Ол бойынша банктер тиісті төлемдер мен ақша аударымдарын сәйкестендіреді.

«Бұл – халықаралық практика. Мәселені қарастыру кезінде халықаралық, Еуропа елдерінің де, таяу көршілеріміз Ресей мен Беларусьтің де тәжірибесі зерттелді», — деп атап өтті министрліктегілер.

ҰЭМ-нің болжамынша, осы ҚҚС салығы есебінен бюджетке жылына 2 млрд теңге түседі.

2021 жылғы 25 қарашада Сенат Салық кодексіне интернет арқылы сатылатын тауарларға цифрлық салық енгізуді қарастыратын түзетулерді қабылдаған болатын.

Добавить комментарий