Қазақстан Президенті Қасым-Жомарт Тоқаев қазақстандықтарды жалған патриотизмнен сақтанып, елдің болашағына назар аударуға шақырады. «Egemen Qazaqstan» газетіне берген сұхбатында Тоқаев дүниетанымымызға жат мәдениеттерге көзсіз еліктеуден, жалған патриотизмнен, даңғойлық пен дарақылықтан сақтану керек екенін айтты.
«Біз өткенді аңсаумен өмір сүрмеуіміз керек. Керісінше, келешегімізді кемел етуге ұмтылып, ұлттың ұлылығын нақты іспен дәлелдеуге тиіспіз. Біз озық ойлы ұлт ретінде халқымызды ыдырататын емес, біріктіретін жолды таңдап, тек қана алға қарап, жалған патриотизм мен даңғойлықтан арылуымыз керек», — деп атап өтті Мемлекет басшысы.
Тоқаев ұлтымыз өсіп-өркендесін десек, жақсыдан үйреніп, жаманнан жирену керек екенін айтты. Ол өз отандастарын бірлік, ынтымақ, еңбекқорлық, білімге ізденіс және адалдық сияқты жалпыұлттық құндылықтарды сақтауға шақырды.
«Жалпыұлттық құндылықтар бәрінен жоғары тұруға тиіс. Бұл туралы үнемі айтып жүрмін. Тағы да қайталаймын, еңбекқорлық, білімпаздық, кәсібилік, бірлік, ынтымақ, жанашырлық, іскерлік, бастамашылдық, адалдық, қарапайымдылық және үнемшілдік – нағыз отаншыл, адал азаматқа тән қасиеттер мен құндылықтар», — деп атап өтті Тоқаев.
