Біріккен Ұлттар Ұйымының штаб-пәтерінде Қазақстанның БҰҰ жанындағы тұрақты өкілі Қайрат Омаров өлім жазасынан бас тартуға бағытталған Азаматтық және саяси құқықтар туралы халықаралық пактіге екінші факультативтік хаттамаға қол қойды, деп хабарлайды ҚР СІМ баспасөз қызметі.
Екінші Факультативтік хаттама Қазақстан Республикасы 2005 жылғы қарашада ратификациялаған 1966 жылғы Азаматтық және саяси құқықтар туралы халықаралық пактіні дамытуға БҰҰ қабылдаған екінші халықаралық құжат болып табылады. Құжат хаттамаға қатысушы мемлекеттің юрисдикциясындағы бірде-бір адамның өлім жазасына тартылмайтынын көздейді. Әрбір қатысушы мемлекет өз юрисдикциясы шеңберінде өлім жазасының күшін жою үшін барлық қажетті шараларды қабылдауға келіседі.
Бүгінгі таңда БҰҰ-ға мүше 193 мемлекеттің 88-і өлім жазасынан бас тартуға бағытталған Азаматтық және саяси құқықтар туралы халықаралық пактіге Екінші Факультативтік хаттаманың қатысушылары болып табылады.
2003 жылы Елбасы Нұрсұлтан Назарбаев елде өлім жазасына мораторий енгізу туралы жарлыққа қол қойды. 2019 жылдың желтоқсанында Қазақстан президенті Қасым-Жомарт Тоқаев Сыртқы істер министрлігіне Азаматтық және саяси құқықтар туралы халықаралық пактіге Екінші факультативтік хаттамаға қосылу рәсімін бастауды тапсырды.
