Қазақстанда депутаттар алкоголь өнімдерін жарнамалауға мүмкіндік беретін заң жобасын қабылдауға дауыс берді. Түсініктемелерде бұл нарықтағы отандық өнімнің үлесін арттырады деп айтылды.
Мәжіліс депутаттары жалпы отырыста заң жобасына ақпарат мәселелері бойынша түзетулерді мақұлдады.
Ақпарат және қоғамдық даму министрі Аида Балаева атап өткендей, өзгерістер екі негізгі міндетті шешуге бағытталған, олардың бірі — бақылау мен жауапкершілікті күшейту. Бұл үшін ақпаратқа қол жеткізу саласындағы уәкілетті органды және оның құзыретін айқындау ұсынылады. Әрбір мемлекеттік органда уәкілетті бөлімше құрылады немесе осы салаға жауапты қызметкер тағайындалады.
Екінші міндет — заңды қолдану аясын кеңейту. Атап айтқанда, мемлекеттік секторды және мемлекеттік функцияларды орындайтын басқа да ұйымдарды ақпарат иелеріне жатқызу, оларды ашық деректерді орналастыруды міндеттеу ұсынылады, — деді Аида Балаева.
Сонымен қатар, заң жобасы отандық БАҚ-тың бәсекеге қабілеттілігін арттыру бойынша бірқатар түзетулерді қамтиды. Соның бірі — мемлекеттік ақпараттық саясаттың бірыңғай жүйесін құру.
Бұл үшін салалық ведомствоға мемлекеттік ақпараттық тапсырысты республикалық және өңірлік деңгейде орналастырудың бірыңғай тәртібін айқындау бойынша өкілеттіктер берілетін болады. Мемлекеттік ақпараттық саясатты қалыптастыру жөніндегі республикалық және өңірлік комиссиялардың мәртебесі заңнамалық тұрғыдан бекітіледі. Оның құрамына ҮЕҰ, БАҚ, мемлекеттік органдардың өкілдері тең дәрежеде кіретін болады, — деп атап өтті министр.
Екіншісі — отандық алкогольді жарнамалауға тыйым салуды алып тастау.
Бұқаралық медиа, кәсіпкерлер, қоғам және мемлекет мүдделерінің теңгерімін сақтай отырып, тауар белгісін және отандық сыра мен шараптың атауын жарнамалауға тыйым салуды алып тастау ұсынылады. Бұл нарықтағы отандық өнімнің үлесін арттыруға септігін тигізеді, — деп түсіндірді Аида Балаева.