Қазақстандық тұрғындардың көпшілігін әлі күнге дейін интернет-қосылыстың қандай да болмасын лайықты сапасымен қамтамасыз ете алмай жатып, “Қазақтелеком” барлық тауарларды міндетті түрде таңбалауды көздейтін жаңа жобаны ілгерілетуде.
“Қазақтелеком” АҚ басқарма төрағасы бюджетке 58 млрд теңге көлемінде қосымша түсімдер түсетінін уәде етті. Қуанышбек Есекеев Қазақстан экономикасы үшін міндетті таңбалауды енгізудің артықшылықтары туралы да айтып берді.
“Негізгі артықшылықтар қатарына 2025 жылға дейін көлеңкелі нарықтың 50%-ға төмендеуін атап өтуге болады, бұл 2025 жылға дейін бюджетке 58,4 млрд теңге, оның ішінде алкоголь өнімдері бойынша – 19,4 млрд теңге, темекі өнімдері – 3 млрд теңге, аяқ киім өнімдері – 24,5 млрд теңге, дәрілік заттарға – 2,1 млрд теңге, сүт өнімдеріне – 2 млрд теңге және жеңіл өнеркәсіпке – 7,4 млрд теңге” , – деді “Қазақтелеком” басшысы үкімет отырысында.
Бұдан басқа, бірқатар тауарларға цифрлық таңбалауды енгізу бизнеске өнімділікті арттыруға, логистикалық схемаларды жетілдіруге, нарық үлесін арттыруға және түптеп келгенде кірісті ұлғайтуға мүмкіндік береді.
2025 жылға дейін заңды бизнес кірісінің өсімі 336,5 млрд теңгені құрайды, оның ішінде алкоголь өнімдері – 80,7 млрд теңге, темекі өнімдері – 7,8 млрд теңге, аяқ киім өнімдері – 149,5 млрд теңге, дәрілік заттар – 43,4 млрд теңге, сүт өнімдері – 16,5 млрд теңге және жеңіл өнеркәсіп – 38,6 млрд теңге, – деп атап өтті Қуанышбек Есекеев.
Акционерлік қоғамның басшысы “Қазақтелекомның” осыдан қанша табыс табатыны туралы ләм-мим демеді.
