Экология министрлігінде хабарлағандай, Қазақстанда ауыл шаруашылығы парниктік газдың ең ірі көзі болады.
Қазақстанда ауыл шаруашылығы 42 млн тонна парниктік газды өндіретін болады, деп мәлімдеді экология, геология және табиғи ресурстар министрі Серікқали Брекешев.
«Болжам бойынша, ауыл шаруашылығы парниктік газдардың ең ірі көзі болады. Шығарындылар шамамен 42 млн тоннаны құрайды. Бұл агроөнеркәсіптік кешенді дамыту драйверлерінің бірі ретінде мал шаруашылығы секторын қолдауға байланысты», — деді Брекешев сәрсенбі күні өткен брифингте.
Оның айтуынша, Екінші ірі эмитент өнеркәсіп (қара және түсті металлургия, цемент және басқа да минералды өнімдер өндірісі) болады. Шығарындылар 21 млн тоннадан асады деп күтілуде.
Мұнай-газ секторы — 6 млн тонна болады.
Модель есептеулеріне сәйкес, 2060 жылға қарай шығарындылар шамамен 76 млн тонна СО2 құрайды
Тұрғын үй-коммуналдық шаруашылық секторында тікелей шығарындылар энергия тиімділігі, электрлендіру, жылыту шаралары, сондай-ақ таратылған жаңартылатын энергия көздерін (ЖЭК) кеңінен қолдану есебінен нөлге дейін төмендетілетін болады. Оның айтуынша, көлікте шығарындылар электрлендіру және сутегі отынын пайдалану есебінен 10 еседен астам төмендейді.
«Жайылымдар мен орман екпелерінің шығарындыларын сіңіру ұлғаяды. Жалпы, біздің есептеуімізше, жерді пайдалану және орман шаруашылығы 2060 жылға қарай 45 млн тоннаны сіңіруді қамтамасыз етеді», — деді министр.
Қалған 31 млн тонна көлеміндегі шығарындылар көміртекті ұстау және сақтау технологияларымен өтеледі, бұл шығарындылар мен сіңірулердің нөлдік теңгеріміне әкеледі, деп болжайды Брекешев.