Қазақстан Президенті Қасым-Жомарт Тоқаев “Квазимемлекеттік сектор субъектілерін құруға мораторий енгізу туралы” жарлыққа өзгерістер енгізіп, мораторийді 2021 жылғы 31 желтоқсанға дейін ұзартты. Бұл туралы дүйсенбі күні Қазақстан Президентінің баспасөз қызметі хабарлады.
“2021 жылдың 31 желтоқсанына дейін квазимемлекеттік сектор субъектілерін құруға мораторий енгізілсін”, – делінген жарлықта.
Жарлық алғашқы ресми жарияланған күнінен бастап қолданысқа енгізіледі.
Естеріңізге сала кетейік, 2019 жылдың 3 шілдесінде Тоқаев мемлекеттің кәсіпкерлік қызметке қатысуын қысқарту және жеке секторды дамытуға жағдай жасау мақсатында 2020 жылдың 31 желтоқсанына дейін квазимемлекеттік сектор субъектілерін құруға мораторий енгізу туралы жарлыққа қол қойған болатын.
Қазақстанның Бюджет кодексі бойынша квазимемлекеттік сектор субъектілері – бұл кәсіпорындар, акционерлік қоғамдар, холдингтер және капиталына мемлекет қатысатын компаниялар, сондай-ақ олармен үлестес заңды тұлғалар. Жарлықта көзделген норма әлеуметтік салада және (немесе) елді мекендердің тіршілігін қамтамасыз ету саласында қызметті жүзеге асыратын заңды тұлғаларға қатысты болмайды; жұмыс істеп тұрған заңды тұлғаларды қайта ұйымдастыру (біріктіру немесе қайта құру) арқылы оларды оңтайландыру шеңберінде құрылатын заңды тұлғаларға; жарғылық капиталында дауыс беретін акцияларының елу жəне одан да аз проценті (қатысу үлесі) квазимемлекеттік сектор субъектілеріне тиесілі болатын акционерлік қоғамдар (жауапкершілігі шектеулі серіктестіктер); Қазақстан Президентінің тапсырмасы және (немесе) келісімі бойынша құрылатын заңды тұлғалардан тұрады.
