Сыбайлас жемқорлыққа қарсы қызмет COVID-19 жұқтырған науқастарға арналған модульді госпиталін салу кезінде қаражаттың ұрлануына қатысты тағы бір істі тергеп жатыр. Бұл жолы әңгіме Шымкентте салынған аурухана туралы болып отыр. Бұл туралы ҚР Сыбайлас жемқорлыққа қарсы іс-қимыл агенттігінің бірінші департаментінің басшысы Мұрат Ахметов мәлімдеді.
«Модульді ауруханалар бойынша біздің агенттікте екі іс қаралуда. Тек Алматыда ғана емес, Шымкентте де тергеу жұмыстары жүргізіліп жатыр. Жүргізілген мемлекеттік аудит актілерінің нәтижелері бойынша сараптама тағайындалған белгілі бір сома белгіленді. Мемлекеттік сараптама ЖСҚ бойынша жүргізіледі, сондықтан тергеу нәтижелері бойынша соңғы соманы сізге кейін хабарлаймыз. Қазір процессуалдық әрекеттері жүріп жатыр, күдіктілер жоқ», — деді Мұрат Ахметов.
Ол кінәлілер тергеу барысында, сараптама нәтижелері мен жиналған дәлелдемелер негізінде анықталатынын атап өтті.
«ЖСҚ әзірлеу кезінде және құрылыс барысында бағаларды заңсыз асыра көтеру фактілері бойынша сараптамалар жүргізіледі. Барлығын толық тексереміз. Сараптамалар бір-екі айға созылады. Шынайылық үшін қатысушылардың барлығын тексереміз, жүргізілген тауартану, құрылыс және басқа да сараптамалардың нәтижелері бойынша біз кінәлілерді анықтайтын боламыз», — деді Мұрат Ахметов.
Естеріңізге сала кетейік, Алматыдағы Жекенова атындағы қалалық клиникалық жұқпалы аурулар ауруханасының коронавирус жұқтырған науқастарға арналған модульдік ауруханасы 2020 жылдың сәуір айында 18 күннің ішінде салынған болатын. Оның құрылысына 5 млрд теңгеден астам қаржы жұмсалғаны хабарланды. Шымкентте маусым айында аурухана ашылды, оның құрылысына да осындай қаржы жұмсалған болатын.
Бұған дейін Алматыда осындай аурухананың құрылысы кезінде жымқыру ісі бойынша тергеу жүргізіліп жатқаны хабарланған болатын.