Қазақстан астанасында жас жігіт бұрынғы сүйіктісін алып қашпақ болған. Алайда оған ауа райы бөгет болды.
Қалалық полиция департаментінің баспасөз қызметі хабарлағандай, 102 пультіне жас жігіт бұрынғы қызын көлікке мәжбүрлеп отырғызып, оны белгісіз бағытқа алып кеткені туралы хабарлама келіп түскен. Қоңырау шалушының хабарлауынша, кешкі уақытта туысы екеуі жұмыстан қайтып келе жатқанда, тұрғын үйдің ауласында оларға көлік жақындап келіп, ішінен төрт жігіт түсіп, әпкесін күштеп көлікке отырғызып алып кеткен.
Бұрын олар қарым-қатынаста болған, бірақ көп ұзамай олар айырылысып, аралары алыстап кеткендігі белгілі болған. Көлік пен ұрланған қызды іздеу үшін қалада “Ұстау” жоспары енгізілді. Бірден жедел ізіне түскен полицейлер күдіктілер тізгіндеген көлікті аңдып, тоқтатты.
Белгілі болғандай, жігіттер оны Түркістан облысына апармақ болған, бірақ ауа райының қолайсыздығынан қаладан шыға алмаған. Қазіргі уақытта адамды бас бостандығынан заңсыз айыру фактісі бойынша сотқа дейінгі тергеу амалдары жүргізіліп жатыр. Полицейлер атап өткендей, баптың санкциясы үш жылға дейін бас бостандығын шектеу немесе сол мерзімге бас бостандығынан айыру түріндегі жазаны қарастырады.