Алматыда электр энергиясының бағасы көтеріледі. Бұл бизнеске түсетін жүктемені азайту жоспарына байланысты.
Әзірге энергиямен жабдықтаушы ұйымдардың (ЭҚҰ) тарифтері әр тұтынушы тобы үшін әртүрлі. Жеке тұлғалар үшін — олар төмен, заңды тұлғалар мен бюджеттік ұйымдар электр энергиясы үшін көбірек төлейді. ҚР Бәсекелестікті қорғау және дамыту агенттігі қазіргі жағдайда шағын және орта бизнес жыл сайын жарыққа шамамен 31 млрд теңге төлейді деп есептеді.
Бірнеше жыл ішінде Қазақстанда бұл жүйені кезең-кезеңімен жоюды, сондай-ақ тұтынушылардың барлық санаттары үшін жарыққа ақы төлеу тарифтерін біріктіру жоспарлануда.
«Кәсіпкерлікті дамыту жөніндегі ұлттық жоба шеңберінде бірнеше жыл бойы тарифтерді саралауды кезең-кезеңмен қысқарту және алып тастау бағдарламасы көзделген. 2022 жылғы 2 наурызда ел Президентінде өткен энергетика және инженерлік инфрақұрылымды дамыту мәселелері жөніндегі кеңесте осы жұмысты пилоттық режимде 3 өңірде – Алматы, Батыс Қазақстан және Қостанай облыстарында бастау тапсырылды», — деді ҚР Бәсекелестікті қорғау және дамыту агенттігінің төрағасы Серік Жұманғарин.
Ведомствоның баспасөз қызметі үш тұтынушы тобы үшін тариф өзгеретінін, бірақ жаңашылдықтардың нақты күні әзірге талқыланып жатқанын түсіндірді. Есесіне, жеке тұлғалар үшін электр энергиясының тарифі қаншаға көтерілуі мүмкін екені белгілі.
БҚДА мәліметінше, Алматы тұрғындары үшін электр энергиясы үшін ай сайынғы төлем құны тұтынылатын энергия көлеміне байланысты орта есеппен 200-300 теңгеге артады. Халықтың әлеуметтік мұқтаж топтары үшін тариф өзгермейді — айырманы оларға атаулы тұрғын үй көмегі есебінен мемлекет субсидиялайтын болады
Қала әкімдігі атаулы әлеуметтік көмектің көлемін және оған мұқтаж Алматы тұрғындарының санын есептейді. Тұрғын үй көмегін алушыларға көп күш жұмсаудың қажеті жоқ.
Тұрғын үй көмегін есептеу бойынша мемлекеттік қызметтерді көрсетуді жеңілдету үшін оны отбасының цифрлық картасын пайдалана отырып автоматтандыру және оны «Е-Шаңырак» АЖ-мен одан әрі интеграциялау жоспарланып отыр. Бұл туралы ҚР ИИДМ Құрылыс және ТКШ істері комитеті төрағасының міндетін атқарушы Айгүл Бүркіталина айтты.
Бүгінде Алматыдағы көпқабатты үйлердегі тұтынушылар (жеке тұлғалар) үшін электр энергиясы тарифі тұтыну көлеміне байланысты кВт/сағ үшін 17,53 теңгеден 28,32 теңгеге дейін құрайды.
