Алматыда мониторинг топтары карантин шараларын бұзғандарды анықтау жұмыстарын жалғастыруда, деп хабарлады әкімдік.
«17 қазанда Медеу ауданының мониторинг тобы «Қазақстан» қонақ үйінің Ball room залында үйлену тойын анықтап, тоқтатты. Іс-шараға шамамен 80 адам қатысқан, барлығы ғимараттан шығарылды. Тиісті шаралар қабылданды. Іс-шара қонақтарына Алматы қаласының бас мемлекеттік санитарлық дәрігері қаулысының нормалары жеткізілді», — делінген ақпаратта.
Сондай-ақ, сенбі күні Әуезов ауданындағы «Інжу» мейрамханасында жаппай іс-шара (құдалық) анықталды.
«Бірінші қабатта іс-шара 40 адамға, екінші қабатта 50 адамға өткізілген. Кейінірек рейдтің мобильді тобы «Аделлина» мейрамханасында 50 адамға арналған осындай іс-шараны анықтады. Түсіндіру жұмыстары жүргізілді», — делінген хабарламада.
Қазанның 8-і мен қазанның 16-і аралығында мониторингтік топтар 1300-ден астам нысанды тексерді. Оның ішінде 314 бұзушылықтар анықталды.