Алматыда «Батырларға тағзым» акциясы өтті. Қала тұрғындары Ұлы Отан соғысына қатысқан ата-бабаларының портретімен қала көшелерімен жүріп өтті.
Алматылықтар соғыс жылдарындағы әндерді шырқап, ҰОС қатысушыларының портретін қолдарына алып жүрді. Әр жерден толассыз құттықтаулар айтылды.
Қала тұрғындары мен қонақтары қолдарына ата-бабаларының портретін алып, Орталық мәдениет және демалыс саябағынан 28 гвардияшы-панфиловшылар саябағына дейін жүріп өтті.
Шеруден кейін 28 гвардияшы-панфиловшылар саябағында қаза тапқан батырларды еске алу үшін мемориалға гүл шоқтарын қойды.
Қалада мерекелік бағдарлама өтеді деп жоспарлануда. Қазақстандық эстрада жұлдыздарының қатысуымен концерт болады, ҰОС ардагерлері мен тыл еңбеккерлері үшін мерекелік түскі ас ұйымдастырылады. Мерекелеу орнында әскери шатырлар тігіліп, заманауи қазақстандық әскери техника мен қару-жарақ қойылды.
Жеңіс күніне орай қалада 40-тан астам түрлі іс-шаралар өткізіледі. Мерекелік іс-шаралар аудан әкімдіктерінің алдындағы алаңдарда, саябақтарда, тіпті тұрғын үйлердің аулаларында да өткізіледі.
