Қазақстанда полиция қызметкерлері Алматы облысында ірі есірткі зертханасын жою бойынша операция жүргізді. Қарасай ауданында орналасқан ғимаратты тінту барысында тәртіп сақшылары 130 келі прекурсор, есірткі өндірісіне арналған жабдықтарды, сондай-ақ шамамен 12 келі мефедронды тәркіледі. ІІМ есірткі қылмысына қарсы іс-қимыл департаментінің қызметкерлері Шығыс Қазақстан, Алматы облыстарының аумақтық және арнайы мақсаттағы бөлімшелерімен бірлесіп, прокуратура органдарының үйлестірумен Алматы облысы Қарасай ауданының аумағында орналасқан жасырын зертхананы жою бойынша ірі операция жүргізді, нәтижесінде саяжай үйінің аумағында есірткі зертханасын ұйымдастырған екі ер адам ұсталды, олардың бірі жақын шетелдің азаматы болып табылады.
Реактор, шыны колбалар, электрондық таразылар, жылу зеңбіректері, тыныс алу маскалары тәркіленді. Есірткі заттарын өткізу мақсатында заңсыз дайындағаны, сақтағаны, сондай-ақ өткізгені үшін Қазақстан Республикасы Қылмыстық кодексінің 297-бабы 3-бөлігі бойынша сотқа дейінгі тергеп-тексеру басталды. ҚР ІІМ есірткі қылмысына қарсы іс-қимыл департаменті бастығының орынбасары Сарқытбай Құсайынов адамдар тобының алдын ала сөз байласуы арқылы аса ірі мөлшерде жасалған бұл қылмыстар үшін мүлкі тәркіленіп, он жылдан он бес жылға дейінгі мерзімге бас бостандығынан айыру жазасы көзделетінін айтты.