Қазақстанның көрнекті саяси және қоғам қайраткері Заманбек Нұрқаділовтың құрметіне Алматы облысы Кеген ауылында ескерткіш қойылады. Бұл бастаманы Қазақстан Президенті Қасым-Жомарт Тоқаев қолдап, тиісті тапсырма берді. Сондай-ақ, Алматыда саясаткер тұрған үйінде ескерткіш тақта ашылады.
Алматыда Нұрқаділовтің туғанына 80 жыл толуына орай ас берілді, жиын барысында Мемлекет басшысы жазған хатты Берік Уәли оқып берді. Сондай-ақ, Мәжіліс төрағасы Ерлан Қошанов, Алматы әкімі Ерболат Досаев, Сенат төрағасы Мәулен Әшімбаев және Алматы облысының әкімі Марат Сұлтанғазиев хат жазды.
Заманбек Нұрқаділов 1944 жылы 15 қаңтарда Алматы облысы Кеген ауылында дүниеге келді, ол 2005 жылы 12 қарашада белгісіз жағдайда қайтыс болды. Оның денесі үйінен табылды, оған үш оқ тиген — екеуі кеудесінен, біреуі басынан. Ресми нұсқада өз-өзіне қол жұмсағаны көрсетілген, бірақ туыстары оның кісі қолынан өлгенін айтып отыр. Саясаткердің әйелі белгілі әнші Мақпал Жүнісова болған.