Белгілі ресейлік оппозиционер Алексей Навальный Харп ауылындағы «Полярный волк» түзеу колониясында қайтыс болды. Қаралы хабарды ФЖОҚ хабарлады, оның неден қайтыс болғаны нақтыланады.
ФЖОҚ-ның ресми хабарламасына сәйкес, 16 ақпанда №3 түзеу колониясында Навальный серуендеуден кейін өзін нашар сезініп, есінен танып құлаған. Медицина қызметкерлері мен жедел медициналық жәрдем бригадасы дереу келіп, реанимациялық іс-шаралар жүргізген, бірақ оң нәтиже болмады, сотталушының қайтыс болғаны расталды.
РФ президентінің баспасөз хатшысы Дмитрий Песков Навальныйдың өлімінің себептері туралы мәліметтер жоғын атап өтті. «Дәрігерлер анықтауы керек», — деп қосты Песков.
Алексей Навальный 1976 жылы 4 маусымда туған, ол Ресей саясатында президент Владимир Путиннің саясатына қарсы шығып, оппозиция көшбасшысы ретінде маңызды орын алды. Ол Ресейдегі жемқорлықты тергеудің арқасында танымал болды.
Навальный 2020 жылы тамызда «Новичок» тобындағы улы заттармен уланғаннан кейін өмірі күрт өзгерді. Германияда емделгеннен кейін, Мәскеуге оралған, келе салысымен паспорттық бақылауда ұсталды.
2022 жылдың наурызында Мәскеудің Лефортов аудандық соты оны аса ірі көлемде алаяқтық жасады және сотты құрметтемегені үшін 9 жылға бас бостандығынан айырды, лд жазасын қатаң режимдегі колонияда өтеді. 2023 жылы оған қатысты екінші үкім шығарылды — экстремистік қоғамдастық құру және экстремистік қызметті қаржыландырды деп айыпталып, ерекше режимдегі колонияа 19 жылға соттады.