Түркияның басты көрікті орны, Ыстамбұлдағы Айя-София мешітіне кіру ақылы болды. Туристер 25 еуро тұратын билет құнына наразы, деп хабарлайды Tengritravel.kz Турпромға сілтеме жасап.
Шетелдік келушілер Айя-Софияға намаз оқуға келетін түріктерден алалап, ақы алуына шамданды. Туристерге ақы төлеу керектігін ескертіп, бөлек есіктен кіргізеді. Еуропалық БАҚ-тың мәліметі бойынша, билет құны 25 еуро, ол жоғарғы қабаттағы галереяға және ЮНЕСКО мұражайына кіруге мүмкіндік береді. Туристер қосымша ақыға касса маңынан орамал мен тиісті киiм сатып алуға мәжбүр. Айя-София ішінде гидтерге топ жинап жүріп, гарнитура пайдалануға тыйым салынды.
Туристер үшін жалғыз нұсқа — Wi-Fi-ға қосылып, ақпараттық таблода QR-кодты сканерлеу арқылы құлаққаппен аудиогидті тыңдау. Аталған қызметтің ақылы ма, жоқ па белгісіз, бірақ құлаққапты жалға алу құны қосымша 100 лира. Стамбул гидтер палатасы (IRO) жаңа ережелер енгізілген күні туындаған хаос пен проблемаларға наразылық білдірді.
Ақылы жүйе енгізілген күн, 15 қаңтарда, түрік БАҚ-тарының хабарлауынша, аз билет сатылды. Туристер наразылық білдіріп «кері бұрылып» кетіп жатты, кейбіреулері түрік азаматтарына арналған есіктен кірді.
Айя-София 537 жылы император Юстинианның бұйрығымен салынған, бастапқыда ол христиан соборы болды, кейін 1453 жылы Осман империясы басып алғаннан кейін мешіт болды. 1934 жылы ғимарат қазіргі түрік мемлекетінің негізін қалаушы Кемал Ататүріктің жарлығымен мұражайға айналды және ЮНЕСКО-ның дүниежүзілік мұра тізіміне енгізілді.