Адам өліміне алып келген жол апатын жасаған және оқиға орнынан қашып кеткен жүргізушінің жеке басы анықталды. Оны құқық қорғау органдарының қызметкерлері ұстады. Хабарланғандай, Алматы облысында болған жол апатына кінәлі полиция қызметкері екені анықталды.
Ол қамауға алып, жұмыстан шығарды, деп хабарлады Алматы облысы ПД.
Жол апаты 23 қаңтарда Алматы-Талғар тасжолында болған. Toyota Prado көлігінің жүргізушісі қарсы жолаққа шығып, Honda Stream көлігімен соқтығысқан. Жол апаты салдарынан Honda Stream жүргізушісі мен жолаушысы Алматы облыстық ауруханасына жеткізілді, 20 жастағы жолаушы алған жарақатынан қайтыс болды.
Toyota Prado жүргізушісі оқиға орнынан қашып кетті.
Полицейлер жол талғамайтын көлікті ішкі істер органдарының қызметкері тізгіндегенін анықтады.
«Аталған факті бойынша қызметтік тергеу жүргізіліп, 24 қаңтарда облыстық ПД тәртіптік комиссиясының шешімімен ол беделіне нұқсан келтіргені үшін ішкі істер органдарынан қуылды. Оқиғаның барлық мән-жайын объективті зерттеуге бағытталған қажетті тергеу амалдары жүргізілуде», — деп хабарлады Алматы облысы ПД баспасөз қызметі.