Әлеуметтік желіде алаяқтықтың жаңа түрі пайда болды. Алаяқтар жүргізуші куәлігі үшін 50 мың теңге төлеуді ұсынады, ал ақшаны алғаннан кейін олар жасырынып, телефондарын өшіріп тастайды.
«Азаматтарға арналған үкімет» мемлекеттік корпорациясы бүгінгі таңда әлеуметтік желілерде қазақстандықтарға жүргізуші куәлігін ақшаға сатып алуды ұсынатын 30-ға жуық жазбалар мен хабарламаларды анықтады, деп хабарлайды мемлекеттік корпорацияның баспасөз қызметі.
«Алаяқтар қарапайым схема бойынша әрекет етеді — клиент оларға қоңырау шалған кезде, олар дайын жүргізуші куәлігі үшін 50-60 мың теңге көлемінде ақша сұрайды және құжатты бір ай ішінде беруге уәде береді. Ақшаны алғаннан кейін олар жасырынып, телефондарын өшіріп тастайды», — делінген хабарламада.
«Азаматтарға арналған үкімет» мемлекеттік корпорациясының қызметкерлері осындай хабарламаларды тұрақты негізде қадағалап отырады және анықталған қажетті ақпараттарды құқық қорғау органдарына жолдайды. Ағымдағы жылдың сәуір айында ҚР ІІМ-ге жүргізуші куәлігін алуға заңсыз түрде көмектесуге үндеген 12 факті бойынша ақпарат берілді.
Мемлекеттік корпорация Жүргізуші куәлігін тек тиісті емтихандардан өту арқылы мамандандырылған Халыққа қызмет көрсету орталықтарынан алуға болатынын айтты.
