Елордалық сот ақшаны жылыстатты деп айыпталған Қайрат Сатыбалдыға қатысты іс бойынша басты сот талқылауының күнін белгіледі. Соттың баспасөз қызметінің хабарлауынша, сот отырысы 1 сәуірге жоспарланған және ашық форматта өтеді.
Қылмыстық іс Астанадағы қылмыстық істер жөніндегі ауданаралық сотқа жолданды. Сатыбалдыға қылмыстық жолмен алынған ақшаны заңдастырды (жылыстатты) деп айыпталды. Антикордың мәліметі бойынша, айыпталушы қылмыстық жолмен алынған ақшаны ақшаны Қазақстанда және шетелде мүлік сатып алу үшін қолданған, сондай-ақ оны ҚР аумағында да, шетелде де банк шоттарына сақтаған.
Бұған дейін Сатыбалдыға басқа да айып тағылған еді. Агенттік оған қатысты салық төлеуден жалтару фактісі бойынша тергеу жүргізіп жатыр.
2022 жылғы қыркүйекте Астана соты бизнесменді өзіне сеніп тапсырылған мүлікті аса ірі көлемде жымқыруды ұйымдастырғаны үшін кінәлі деп танып, үкім шығарды. Ол алты жылға бас бостандығынан айырылып, мүлкі тәркіленді. Сатыбалды сондай-ақ «Қазақтелеком» ұлттық байланыс операторына миллиардтаған шығын келтіргені және «Көліктік сервис орталығының» қаражатын жымқырғаны үшін кінәлі деп танылды.