Ақмола облысы Целиноград ауданының құрылыс бөлімінің бастығы тұтқындалды. Ол бюджет қаражатын жымқырды деп айыпталды.
Прокуратура әуел баста Қосшы қаласының құрылыс бөлімінің басшысына қатысты іс қозғалғанын хабарлаған, бірақ Қосшы әкімдігінің баспасөз қызметі әңгіме Қосшы қаласы емес, Целиноград ауданының бөлімі туралы сөз болып жатқанын айтты.
Ақмола облысы құрылыс бөлімінің басшысы 222 млн теңгеден астам қаражатты жымқырды деген күдікке ілінді. Облыс прокуратурасы прокурорлық тексеру нәтижелері бойынша сыртқы электрмен жабдықтау объектілерін салу кезінде қаражат жымқыру фактісін анықтады.
«Тапсырыс беруші ретінде Целиноград ауданының құрылыс Бөлімі атынан тұрғын үй массивтерінің қызмет көрсетуге арналған трансформаторлық қосалқы станцияларды орнатпай, 222,2 млн.теңге мөлшерінде негізсіз төлем жүргізумен осы жұмыстарды орындау туралы актілерге қол қойылғаны анықталды (2019 жылдан бастап қазіргі уақытқа дейін жұмыстар орындалған жоқ)», — деп хабарлады Ақмола облысы прокуратурасының баспасөз қызметі.
Арнайы прокурорлар басқармасы осы факті бойынша Қазақстан Республикасы Қылмыстық кодексінің 189-бабының 4-бөлігі 2-тармағы (аса ірі көлемде жымқыру) бойынша қылмыстық істі тергеуде. Бұл бап бойынша жаза 7 жылдан 12 жылға дейін бас бостандығынан айыруды көздейді.
Құрылыс бөлімінің басшысы қамауға алынды. Өзге ақпарат тергеу мүддесінде жария етуге жатпайды.
